عمران عامی شاعر ہے‘ نوجوان شاعر!!!

 ۔ ۔ ۔ مگر وہ اس کم عمری میں بھی صوفیوں کے جیسے سلوک کا اظہار کرتا ہے۔

 عام طور پر ایسا نہیں ہوتا کہ کوئی شاعر زندگی کے سارے طور طریقوں‘ تہذیب کی تمام تر گپھاؤں اور تمدن کی چھاؤں من میں سمو لے‘ تن کا حصہ بنا لے اور اپنے جذبات ’’اُبتنے‘‘ کی بجائے‘ دوسروں کی روحوں کا حصہ بنا دے۔ عمران عامی کی شاعری پڑھتے ہوئے میں نے اُسے اپنی رگوں میں دوڑتے پھرتے لہو کے دیگر اجزاء کی طرح محسوس کیا۔

 ’’ابھی بھیگ جانے کا موسم نہیں‘‘ اس کا پہلا شعری مجموعہ ہے اور اس کے شعوری ادراک کا یہ عالم ہے کہ

شعاعِ عشق میں چلنے کے فن سے واقف ہوں

بجھے چراغ جلانے کی کیا ضرورت تھی

۔ ۔ ۔

سوچ لے عشق کی عدالت میں

تاج سر سے اُتارے جاتے ہیں

 کیا خیال ہے؟ اگر اس کا پہلا شعری مجموعہ نہ ہوتا تو کیا ۰۴، ۰۵ شعری مجموعوں والوں کے پاس کوئی ایک شعر بھی ایسا ہے؟

شب کی تاریکیوں میں دیکھ ذرا

تارا‘ تاروں کے سنگ چلتا ہے

 عمران عامی کسی شعری تجربے سے نہیں اُلجھا‘ اس نے روایت کو روایتی ہی رہنے دیا‘ جہاں جدیدیت کی ضرورت پڑی اس کا کلام تازہ و تر چونکا دیتا ہے۔ یہ واقعتا ایک اضافی خوبی ہے‘ وہ بنیادی طور پر محبتوں کا شاعر ہے لیکن اس کے اندر جو ملامتی صوفی بیٹھا ہے وہ اسے کچوکے لگاتا رہتا ہے۔

 اس پہلے قدم پر‘ اس قدر ’’پک قلمی‘‘ کے لئے عمران عامی واقعی مبارکباد کا مستحق ہے۔

تنویر عباس نقوی

اسلام آباد

اِس کائنات کی کوئی بھی چیز مکمل نہیں‘ کوئی حرف بھی حرفِ آخر نہیں‘ کسی کو بھی کسی فن پر مکمل دسترس حاصل نہیں‘ اور یہ ایک حقیقت ہے اور اس حقیقت سے آنکھیں چرانے والے شاید یہ نہیں جانتے کہ کبوتر کے آنکھیں بند کر لینے سے بلی بھاگ نہیں جاتی بلکہ اپنا کام زیادہ آسانی سے سرانجام دے لیتی ہے۔ اگر میں یہ کہوں کہ عمران عامی ایک مکمل شاعر ہے تو یہ نہ صرف خود سے بلکہ حقیقت سے آنکھیں چُرانے والی بات ہے لیکن یہ نہ کہنا بھی زیادتی ہو گی کہ عمران عامی ایک خوبصورت لہجے کا شاعر ہے جس کا اپنا جداگانہ انداز ہے اور اس نے اپنی شاعری میں جا بجا نئی جدتیں متعارف کروائی ہیں۔ اور جو کچھ میں نے لکھا ہے اس کے لکھنے کا مقصد صرف اتنا ہے کہ عمران عامی کی شاعری کو نہ صرف تنقیدی نظر سے دیکھا جائے بلکہ تعمیری نظر سے بھی دیکھا جائے کہ آنے والی نئی نسل ہماری بھرپور توجہ کی مستحق ہے۔ اگر ہم نے ان پر پوری توجہ نہ دی تو یہ نئی نسل کتابوں سے نکل کر صرف کمپیوٹر میں گم ہو جائے گی اور پھر فرعون مصر کے مقبروں کی طرح صدیوں بعد ان کا کھوج ملے گا۔

عمران عامی نئی نسل کا نمائندہ شاعر ہے مجھے تو اس کی شاعری بہت اچھی لگی۔ اب یہ آپ کے سامنے ہے (ابھی بھیگ جانے کا موسم نہیں) کے روپ میں آپ خود فیصلہ کیجئے گا کہ شاعری کیسی ہے میں تو یہی کہوں گا

اللہ کرے زورِ بیاں اور زیادہ

ملک جاوید جوگی

بوچھال کلاں‘ چکوال

کبھی کبھی یاد رکھنے کو بہت کچھ ہوتا ہے اور بھول جانے کو کچھ بھی نہیں ہوتا‘ اور کبھی کبھی بھول جانے کو بہت کچھ ہوتا ہے اور یاد رکھنے کو کچھ بھی نہیں‘ کبھی کبھی بھول جانے کو جی چاہتا ہے لیکن یادیں ہیں کہ کونجوں کی ڈاروں کی طرح اُڑتی چلی آتی ہیں اور کبھی کبھی یوں ہوتا ہے کہ لفظوں کا کال سا پڑ جاتا ہے۔

آج رشتے اِک بے نام سی چیز ہو کر رہ گئے ہیں‘ ہم صرف خونی رشتے نبھانے کے پابند ہیں جو ہمیں ورثے میں ملے ہوتے ہیں اور جو رشتہ ہم خود سے بناتے ہیں اس کو نبھانے کے پابند نہیں ہوتے!

ایسا کیوں ہوتا ہے؟

قدرت کے فیصلوں کے سامنے انسان بے بس ہے مگر انسانی فیصلوں کے آگے اسے ڈٹ جانے اور اپنا حق وصول کرنے کا حق حاصل ہے لیکن کچھ فیصلے ایسے بھی ہو جاتے ہیں جو اپنے حق میں بھی نہیں ہوتے مگر ان کے خلاف مزاحمت کرنے کو بھی جی نہیں چاہتا۔ ۔ ۔  کبھی کبھی انسان کو ناکردہ گناہوں کی سزا بھی بھگتنا پڑ جاتی ہے۔

ایسا کیوں ہوتا ہے؟

گزری ہوئی باتوں کو بار بار دہرانا‘ یار لوگوں کی نظر میں کم عقلی ہی نہیں بلکہ بیوقوفی بھی ہے مگر کئی بار بات کی اصلاح اور واقعات کی درستگی کے لئے ماضی کی لغت میں جانا ہی پڑتا ہے شاید‘ ہم یہ بھول جاتے ہیں!

انسانی سوچوں کا محور ہمیشہ سے ہی اُس کا محبوب رہا ہے مگر اس دور میں ہر کسی کے پاس اپنی ضروریات سے زیادہ سوچیں گروی پڑی ہوئی ہیں جن کی واپسی جان جوکھوں کا کام لگتی ہے‘ سچ تو یہ ہے کہ ہم لوگ اپنی سوچوں اور ضروریات کو محدود کر ہی نہیں سکتے کیونکہ ہم خود کسی حد میں رہنا قطعاً پسند نہیں کرتے۔ ۔ ۔ !

دوستی جب جوان ہوتی ہے تو محبت کا روپ دھار لیتی ہے بس اس میں ذرا رنگ بھرنے کی دیر ہوتی ہے۔ زندگی حسن کی محتاج ہے اور حسن عشق کا جزو اوّل بلکہ حسن و عشق ہی اصل زندگی ہیں۔

میں یہ الفاظ تحریر کر رہا ہوں تو میرے چوگرد کاغذی شہر آباد ہے‘ کاغذی لوگ بکھرے ہوئے ہیں‘ کتابوں سے پھول کی پتیاں گر چکی ہیں (جو اس بات کی گواہی دیتی ہیں کہ میں نے ہی انہیں کتابی جیل میں دل بہلانے کے لئے رکھا ہوا تھا) چونکہ کتابیں اپنی اپنی حالتیں بدل رہی ہیں ہر طرف سکوت و خاموشی ہے ماسوائے گھڑی کی ٹک ٹک کے کوئی آہٹ و آواز سنائی نہیں دے رہی ہے اور میں ہوں کہ میں نے اپنی آواز کو خود ہی قید کردیا ہے‘ اس لیے کہ کوئی سن نہ لے شاید اس لیے بھی کہ کوئی دیکھ نہ لے۔ ۔ ۔  مگر آواز کا دیکھنے سے کیا تعلق۔ ۔ ۔ ؟

ارے میاں! اکیسویں صدی میں آواز دیکھی جاتی ہے اور تصویر سُنی جاتی ہے۔

یہ ایک الگ بحث ہے!

زیادہ نعشوں کے لیے زیادہ قبروں کی ضرورت پڑتی ہے۔

خاموشی بہتر ہے۔

دعا کیجئے گا کہ میں جن کی عدالت میں پیش ہونے جا رہا ہوں اُن کی عدالت کا جج آنکھوں والا‘ اور محبت کے دکھ درد کو سمجھنے والا ہو۔ ۔ ۔

’’ابھی بھیگ جانے کا موسم نہیں‘‘ میرا پہلا شعری مجموعہ ہے اور میں سمجھتا ہوں کہ مجھے زیادہ کہنے کی ضرورت نہیں‘ خاص طور پر ان صفحات میں۔ مجھے آپ میری شاعری میں ڈھونڈیے گا یا ان اساتذہ‘ شعراء کی آراء میں جنہوں نے میرے بارے میں خواہ ایک لفظ بھی لکھ دیا ہو۔

میں اس موقع پر اپنے اساتذہ‘ دوست شعراء اور کرم فرماؤں کا شکر گزار ہوں جن کی حوصلہ افزائی سے میں اپنے کلام کو آپ کے سامنے کتابی صورت میں لے کر حاضر ہوا ہوں۔

آخر میں ایک بات جو میں اکثر کہتا ہوں‘ کہتا ہی چلوں کہ

معاف کیجئے گا میں کہتا بہت ہوں مگر مجھے خاموش لوگوں سے اُتنی ہی محبت ہے جیسی کہ سُروں کو آواز کے ساتھ۔ ۔ ۔ 

آپ کی آراء اور مشوروں کا منتظر۔

عمران عامی

0333-5159793

aami_lib03 [at] yahoo [dot] com

راولپنڈی